阿拉老底子每天呈送精彩文章一组
打开尘封的记忆，寻觅往昔的岁月
叙老底子事 忆老底子人
诉老底子情
来源：横马路、竖马路
作者：陆勇
沪语改写：丁一军
讲述：薛南平
文字、语音审核：丁迪蒙
编辑：王乙其
（上）
杭州富商鲁迟惟决定到上海来搭朋友佮伙做生意。
“上海是繁华个天堂，也是罪恶个老窟，有一帮强盗瘪三专门拣来上海做生意个外地人下手，千万千万要当心。”堂兄写信来关照。十年前头，堂兄到上海来做生意，吃过亏，赚过钞票，经过几趟沉浮，已经老拎得清个了。
鲁迟惟从报纸浪看到过勿少上海冲手作案个事体，有刚刚到上海做生意搭仔白相个人，下火车或者码头，还呒没到旅馆，已经拨偷个精光。鲁迟惟花了几天功夫，衣裳全部调成功上海滩场面浪个人个行头，戴好金丝边眼镜，礼帽也托堂兄寄过来上海最新个样子，连得吃个香烟，本地个侪勿带，专门吃上海上等人吃个大英牌子，还用新式弹簧打火机，马路浪逛仔几圈，竟然呒没人认出来，还以为是上海某个大少爷到搿搭一游。鲁迟惟心里向想,搿能样子精心打扮,可以讲是万无一失。
几日天之后，鲁迟惟手里拎仔只小皮箱，一清早乘沪杭火车，坐仔头等车厢，一路顺风。
下半日三点钟，火车到仔北站，鲁迟惟跟老牢人流下车了，到了出口，人人侪要打开箱子检查。出站个人排队等勒海检查，检察员嘴巴浪勒勒停个喊：行李开开，开开来。鲁迟惟看到旅客提仔箱子挎仔包扶好仔老人搀之小人，轧作一堆。伊摸出香烟，慢腾腾个吃了一根，等人少了，伊再过检，检察员上下看了伊一眼，点点头：“先生，勿用开箱子个。”用白粉笔勒海皮箱子浪画了只圆圈。鲁迟惟暗暗叫得意，抬头挺胸，大步走出车站。
堂阿哥慎达从人堆里轧出来，拉仔伊到路边浪，上了部黑颜色个福特汽车。车子浪,堂阿哥问伊，一路浪头好伐？鲁迟惟笑了笑：安然无恙，连得出站也太平无事。
到了后马路个大通旅馆，住进慎达为伊安排好个房间。两家头坐下来，讲张了一歇屋里向最近个事体，鲁迟惟侪作回答了，还讲家君有封信要交拔伊，讲了之后，手就伸到衣裳袋袋里，突然喊了声：“勿好！”“信没带？”
“勿是，信搭仔我个皮夹子一道摆勒袋袋里了，信勒海，皮夹子勿见脱了”鲁迟惟拿信摸出来，又急急忙忙去摸两只衣裳袋袋，面色马上夹䩍势白。
“会勿会呒么带，落了屋里向？”“勒杭州上车之前，我还摸过，勒海个。”
“路浪向啥人轧牢仔侬坐，或者有人拉侬？”
“我靠窗口头坐，摆皮夹子个袋袋也靠勒窗搿一头，袋袋有一只手介深，又呒没坏脱，万万呒没落脱个道理。车子浪也呒没一个人靠近我，下车也呒没人碰我，奇怪奇怪。”
慎达想了想讲：“阿弟，侬碰着冲手了。”
“万万勿可能，我出站个辰光，检察人员侪认为我是上海小开，呒没要我开箱。”
“侬一定是露马脚了，拨人家看穿了。”慎达又上到下，由下至上仔仔细细看看鲁迟惟，搔搔头皮，自言自语：“一副上海小开派头，只是阿拉勿是贼骨头，眼乌珠平常来西个。”
“堂阿哥,侬是老上海了，侬也看勿出，冲手有孙悟空个火眼金睛？”
“阿弟，搿能样子伐,算侬倒霉一趟，上海每日天勿晓得有几百个人拨冲手冲过，巡捕房侪懒得管，鼻头一捏，就算倒霉伐。”
鲁迟惟老扫兴个坐下来，一面孔个苦恼，点了支香烟，叹口气讲：“我勿是肉麻几张钞票，我是实在心里向勿服气。搿只冲手，是看我露了啥个马脚，我浑身上下阿里得有得破绽呢？”
“搿侬想哪能弄法子啊？”
“堂阿哥，侬是场面上兜得转个人，能否寻侬个朋友，想办法寻转来。我可以勿要钞票，还可以情愿加一倍奉送拨伊，只要晓得我个马脚露勒啥地方？我勿服气呀。”
慎达听了笑起来了。讲：“好一个勿服气，葛么我就来试试看。”讲好之后下楼到账房去打了只电话，回来讲：“阿拉就坐勒海等消息伐。”
（下）
大概有得一顿饭个辰光，来了个长袍马褂蛮体面个人，进门就手一拱，稍微哈哈腰：“得罪得罪，实在勿晓得是鲁少爷个同胞，有所冒犯，小阿弟特地来赔礼道歉。”讲好闲话，从衣裳袋袋里摸出只黑颜色个皮夹子，两只手恭恭敬敬捧到鲁迟惟眼门前。“阿拉拿到搿只珍贵个物事，并呒没动过里向个钞票、物事，请鲁少爷亲自查看。”
搿个人中等模子，廿几岁，着衣裳个样子老一般，呒没一块地方好看。就是两只小眼睛，眼乌珠墨黜黑，勒眼眶里勿停个翻，眼神含蓄又有几分飘忽。
鲁迟惟倒呒没想到搿桩事体办得介快，看到对方面色笃定，呒没一点吓丝丝，呒没一点傲慢，一记头闷脱。还是慎达勒上海辰光长，见识过场面。伊接过皮夹子，也勿开开来，摆勒一边个台子浪。
“哪能讲是冒犯，误会而已，麻烦侬跑一趟，阿拉阿弟呒妹责怪侬个意思，只是想讨教讨教。”
搿个人淡淡叫一笑：“鄙人心里向清爽，只是照规矩，实在有为难个地方。”
“请侬过来，并勿是要讨回钞票搭仔物事，阿拉阿弟刚刚到上海，就拨侬一眼看穿，阿拉心里向邪气佩服侬，只是阿弟老想晓得，伊到底是勒阿里露了马脚？承望能够指点一二，感激勿尽。”
“勿敢。”搿个男人轻轻叫讲，稳稳个立勒海。
“尽管讲，呒没关系个。”慎达敬上香烟，搿个人并呒没接。
“我跟侬爷叔也算是知交，自家人唻。”
“搿就得罪了。”搿个人慢慢叫讲了“要讲搿位鲁少爷，从头顶到脚底，侪是上海少爷个派头，并呒没露马脚。”
“葛末讲起来……”鲁迟惟一面孔怀疑搭仔糊涂。
“少爷下车,点香烟，是大英牌香烟。”
“是个呀。”鲁迟惟连连点头。
“用个是大英牌弹簧打火机，还是旧年仔再有个新货，上海有钞票人家也勿大用个。”“一眼也勿错。”“少爷拿出香烟，勒香烟壳浪敲了几记。”
鲁迟惟又点了点头。“香烟勒点之前敲几记，是因为烟丝忒松，是外地个蹩脚香烟。大英牌是绝对个好货，烟丝松紧恰到好处，勿需要再敲个。少爷吃大英牌，还要随手敲紧烟丝，搿就老怪了，搿就是讲，少爷平常辰光是勿吃大英香烟，是吃……，譬如金鼠、老刀等外地人吸吃个烟，搿种香烟勿敲几记是勿好吃个。”
慎达扬扬手，哈哈大笑:“明察秋毫，搿位仁兄，勿要再讲了。”
“得罪了。”男人轻轻叫一笑，黑眼乌珠闪过，面孔浪露出得意之情。
鲁迟惟目瞪口呆，看看手浪向个烟，长叹一声，拿起皮夹子，拿出所有钞票送拨伊。“服气，但是勿号让侬空手回去。”
伊勿收，别转身出门，鲁迟惟一呆。慎达讲：“照规矩，我会得拿钞票拨伊个老板。”
茶房泡了一壶茶、倒仔两杯，摆勒台子浪立勒海勿走，慎达问：“有啥事体伐？”茶房搓搓手：“侬鲁少爷也是熟人，一直照顾阿拉个生意。小人有句闲话想讲。”“噢，讲好勒唻。”“刚刚搿个人，一定是冲手，两位要当心。”
鲁迟惟邪气好奇，问：“侬哪能晓得个？”
“眼乌珠发黑，用神过度，眼光游移，所看到个必定记勒心里向，食指中指并勒一样长，骨节勿凸出来，搭一般人勿一样了，我看得多了，一眼就认出来了。伊拉专门拣外地客人下手，呒没勿成功个，搿种冲手，伊拉个行话叫青插手，江湖浪称剪绺（音柳）。”讲好，就退出了房间。
鲁迟惟一屁股坐勒沙发浪，自言自语：“我看搿茶房也是眼乌珠发黑，东看西看个。”
讲述：薛南平
丁迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
转自：“海上梦叠”公众号
我知道你在看哟~